Härzlich Willkomme uf mirä nöie Website und no ganz viu me News

Mini Liebä

Äs fröit mi sehr, dass mini Website äntlich im ne nöie, moderne Gwand online isch. Ganz äs feschts Merci mim Fründ Roger, wo ganz viu Stunde für mi nöi Internetuftritt investiert het. Ohni ihn wär das nid möglich gsi. Är isch u blibt für mi dr Bescht.

Ganz viu, hei lang nümme vo mir ghört, gläse oder gseh. Drum ischs mir äs alige öich ä churze Rückblick zgä uf mini letschte 4 Jahr. Äs isch ungloublich viu passiert sit mim letschte News Biitrag im 2019. Die letschte 4 Jahr, hei mi unheimlich prägt. 

I ha d'Rolle als "MEGA" im Musical "Space Dream" übercho. Corona bedingt, hei mir das mehrmaus müesse verschiebe. Ersch im März 2022 hani de äntlich dörfe d'Mega ir Maag Halle Züri spiele. 

Nachdäm "Sister Äct" oh wieder verschobe worde isch, häts när äntlich im Herbst 2022 söue stattfinde. Oh z'Engagement vo "Die Bremer Stadtmusikanten" isch scho lang unterschriebe gsi..  Fröid isch riesig gsi, aber wies mängisch so chunt, passiere Sache wo me nid het chönne vorusgseh. Bi üs het sich äs Bébé uf ä Wäg gmacht u i ha de die 2 Produktione müesse absäge. Leider hei mir üse Krümmel nach dr Geburt müesse la ga. Danke Dominik, danke Tino hani nach däm Schicksalschlag wieder dörfe i die Produktione mit istige. 

Im Mai 2023 hani d'Rolle vo dr Mama Morton im Musical "Chicago" bi de Westside Singers dörfe spiele. Es het ungloublich Spass gmacht mit derä farbige Truppe uf dr Bühni zstah. 

Jetz fröi i mi uf au di viele Hochzyte wo im Summer no wärde mit mir stattfinde und uf d'Wiederufnahm vo "Sister Äct" u "Die Bremer Stadtmusikanten" im Herbst. 

schicke öich ganz viu liebi u i fröi mi druf öich aui gli wieder mau zgseh.